安龍、安隆、安然，三種叫法，都係指Enron，以香港人嘅叫法，安龍呢個譯名易聽啲，安然就不知所謂。以國語發音，「然」係ran，唔係ron，做乜鬼《蘋果》同《明報》要叫佢做「安然」呢？唔多明，大報啲編輯可能零舍醒都唔定。
安龍被調查，搞到風聲鶴唳，但最近揭露嘅事實係，美國國會啲調查安龍事務委員會，共有十一個，人數共二百四十八人，其中有二百一十二位議員收過安龍嘅政治獻金，如果話凡係收過水嘅都要退出調查委員會，咁就唔夠議員去調查咯。
香港嘅T議員自己大把身家，唔使為政治捐款費心，但就好驚為安龍呢類事情費心。佢話：「𠵱家做上市公司非執行董事好牙煙，如非至愛親朋做主席，千祈唔好搵我，但如果係至愛親朋，又會俾人話董事會係私人俱樂部，兩面不討好，所以最好就係唔做上市公司董事。」陳啟宗應該一早抱此態度，就唔會無辜辜俾安龍拖落水。退休議員L就話：「揸美國護照嘅有錢富豪，千祈唔好做美國上市公司非執行董事，以後大家要記住。」跟住大家講起九鐵，忽然之間醒起，做公營機構公司董事，亦都好麻煩，冇報酬之餘，一出事就會俾傳媒鬧，俾議員鬧，實在唔化算，啲大公司老細大班開始怕怕咯，以後就算董特首親自打電話邀請，都怕好難同佢為公益捱義氣。