美心集團睇中引起全城哄動嘅國泰航空送機票活動，噚日正式送出一百萬美心飲食券畀國泰，等一萬個被國泰抽出嘅幸運兒，每人都可以攞住一百蚊飲食券，喺美心旗下六十幾間食肆度食個飽飽。
咁都唔止，美心重送多一萬張由佢哋代理嘅Starbucks咖啡贈飲券畀班幸運兒，等佢哋shopping到攰攰哋時，就坐低歎番杯咖啡咁話，的確幾周到喎！
美心集團主席伍沾德話，國泰公布送機票活動當日佢都在場，佢聽到政務司司長煲呔曾話希望多啲旅客嚟香港飲茶之後，靈機一觸，決定要響應國泰嘅活動，一齊推動旅遊業同飲食業咁話喎，果然有創意！
（圖）為響應國泰送機票活動，美心送出一百萬飲食券，同一萬張咖啡贈飲券，由集團主席伍沾德（右）主持儀式。
E-mail：