又有新股上市，今日輪到藍帆科技（8166）掛牌。科瑞控股（8199）一役被老點之後，小初開始對新股有戒心，但係經紀陳又話藍帆得喎，果然係經紀，乜鬼都sell得一餐。
藍帆今次以每股24仙，發行2億股新股，集資額5280萬元，雖然包銷商同上次科瑞一樣，都係漢記，但經紀陳話搞手今次唔同上次科瑞，叫小初唔好有陰影。佢重反問小初，究竟有幾多人有貨？如果通街都冇貨嘅話，炒得成嘅機會就大好多。據講今次2億股新股中，有1.76億股由10位投資者分咗，貨源都幾集中，應該炒得成。小初心諗，即管睇吓點？
另外，上次傳聞因為大股東被斬倉嘅惠揚控股（231），復牌以來股價急升。噚日再升6.5%，收4.9仙。炒家重出動到大行牌如滙證及高盛等。不過，經紀陳話唔好掂，因為人哋由仙幾開始收集，𠵱家沽出唔知幾和味，無謂幫人接貨。