精品L想喺旺角搵舖，問經紀李有冇好介紹？且聽經紀李細心分析：月餅場有排守，連水貨天后祥嫂都嗌救命，近期有唔少舖招頂手，最好睇定啲先。新天地都入流，但個場只旺賣衫，一百蚊三件Tee最啱，精品唔多適合。潮流特區最旺人氣，但同場競爭大，而且想租都有排等，頂手費亦唔平。剩番兆萬同銀城，兩個場叮噹馬頭，各有特色，不過論進取一定係兆萬，經紀李話原來兆萬大業主好鍾意度橋，搵錢其次，最緊要搞到個場有Noise（迴響），呢啲老細重視成功感多過利益，香港地多幾個呢類老細就有救。
對面嘅銀城業主見到，又點可以比下去？同樣畀心機度計整旺個場，終於諗到將停車落貨區於夜晚改成FleaMarket（跳蚤巿場），賣時下流行精品，結果旺丁又旺財。不過最近被人去報投訴，話嗰度阻街，搞搞吓地政處重話將落貨區改成地檔係違反地契，𠵱家要積極跟進㖭。本來一條好橋唔知會否因此被打沉？
經紀李總結：為商場度橋確唔易，淨係睇兆萬班軍師都辛苦，一年內將商場內改建四、五次起碼，本來做開美食廣場，點知唔夠半年就將其中一半做番舖，最近重索性執晒做番晒零售，總之一定反應要快。
主持人：大食Jack
八卦熱報：