賣地勝預期，地產股反彈。雖然噚日拍賣嘅細地皮冇咩指標作用，但喺市場氣氛欠佳嘅情況下，地皮價錢賣得較市場預期好，好友都叫做出師有名，抽高地產股，終止恒指連跌4日嘅弱勢。不過，恒指噚日雖然回升30點，但對技術走勢冇咩改善，而且再試今年低位10661，反映重未完成尋底。
港股牛皮待變，等新消息入市，加上農曆年假將近，一般散戶都係睇多過做，趙飛雲亦唔例外，雖然南航（1055）已跌至目標價，但倉內揸貨唔少，所以冇買到。不過隻股噚日跌近50日線（現處2.36元）反彈，短炒有機會執幾個價。
深圳國際（152）有消息，但股價冇反應，重微跌一個價，暫時應無大跌風險，可以揸住先。中旅國際（308）噚日高層亦有利好消息發布，例如估計3年後營業額翻一番變10億元，又與國內合作開辦日韓世界杯睇波團等，但股價先高後低，似係春江鴨趁好消息出貨，短期如見跌近50日線（現處1.63元）附近，可以博反彈。公司前景看好，趁每次調整收集，短中線贏面大。