昨日喺立法會會議室A嘅特別會議，堪稱蛇年年尾最強戲碼。第一，貴為成衣界巨子嘅田北辰首次出席立法會，以九鐵主席身分，俾議員質詢九鐵賠一億畀西門子嘅事；第二，九鐵行政總裁楊啟彥明知議員唔多妥佢都硬住頭皮出席；第三，向來脾性唔差嘅吳榮奎竟然都沉唔住氣，同「大舊」陳偉業駁火。
田北辰一身深藍西裝，粉紅恤衫襯銀色公仔圖案領帶，穩重得嚟又帶啲浪漫。講時講，呢位少爺初試啼聲，估唔到都揮灑自如，應對議員質詢從容淡定，難怪事前準備質問九鐵加價嘅李卓人公開讚揚，話佢識得轉移視線。
反而經驗老到嘅吳榮奎竟然俾「大舊」搞到沉唔住氣。事緣陳偉業問佢董特首知唔知今次事件，重質疑佢「欺上瞞下」，吳榮奎即刻燶起塊面話唔好樣樣都賴特首，件事唔需要話畀特首知，陳偉業重駁多句：「咁即係冇啦！」吳局長又回一句：「『唔需要』同『冇』係兩件事！」
楊啟彥當然身經百戰，但係就恃老賣老，成個會議都懶洋洋咁攤喺沙發度，同身邊正襟危坐嘅田北辰相映成趣。不過最搞笑係完咗會議之後，楊啟彥拒絕接受訪問，記者群起而追之，楊啟彥就率領一眾公關同記者衝紅燈亂過馬路，企喺路旁嘅一個軍裝警察，就有啲無可奈何。
另外，田北辰雖然噚日着住件粉紅色恤衫，但係佢心情原來唔多好。八方聽講田北辰媽媽大前日喺瑪麗醫院，因為末期癌症去世，今個星期五就會大殮；如果各位議員知道田北辰係帶孝上陣，相信都會輕手啲。
田北俊原本都約咗班黨員過幾日去食鮑魚團年，噚日都臨時取消咗，相信大家都理解佢兩兄弟嘅感受，希望佢哋節哀順變。
E-mail：