主隊大馬電訊明星隊除搵咗唔少亞洲有名嘅車手組隊參賽外，其他方面都好肯落本，計有車隊按摩師、機械師、教練同領隊等，仲搵埋馬來西亞電訊嘅攝影師全程跟住車隊，據聞花費超過四十萬港元，認真唔嘢少。
噚日第四站賽事，跟住車隊嘅採訪車途中塞車受困，載住香港記者嘅司機諗住抽頭之際，見到警察停一停，尾隨嘅中央台採訪車收唔住油撞埋我哋架車嘅車尾，坐係後座嘅我同另一位香港記者，就分別撞傷頸同頭，好在傷勢唔算嚴重，算係還得神落。
每場賽事都百幾公里，通常都要四、五個粒鐘至賽完，而賽會工作人員遇到人有三急嘅時候都幾麻煩，男嘅就話可以係路邊搞掂，女嘅就要忍到油站至可以解決，大熱天時，都咪話唔辛苦！