馮仁昭日前喺港島香格里拉酒店coffeeshop，遇見𠵱家專心搞美容生意嘅張玉珊同才子蕭若元密密斟，馮仁昭聽到佢哋傾緊美容生意，重話會喺尖沙嘴開舖，莫非蕭公子都有興趣賺女人錢？
馮仁昭之後打電話畀蕭公子，佢話當日同張玉珊係傾美容生意，重話見到對方將「修身堂」搞得咁有聲有色，咪搵佢傾吓合作嘅嘢囉。問蕭公子點解對女人豐胸、減肥咁有興趣？佢就話：「𠵱家女人錢就最好賺，所以咪想試吓搞美容生意。不過嗰日大家只係吹吓水，傾得好初步。」
早排張玉珊搵埋第二代產品代言人袁潔瑩，齊齊為「修身堂」拍賀年廣告。身為老闆娘嘅佢都算係為盤生意瞓晒身，袁潔瑩一邊拍，佢就一路揸住部數碼相機拍低畀袁潔瑩睇番，佢重話做生意係力不到不為財。
張柏芝前日出席完港台嘅宣傳活動後，去咗九龍城輝哥火鍋度食晚飯，成班記者當然死守門口啦！到咗九點幾，老闆輝哥走出嚟同大家講，話柏芝已經由秘密通道走咗。記者即刻趕去柏芝喺又一村嘅屋企，見佢屋企裏面已經着晒燈。其實前晚成班記者都見到柏芝行路健步如飛，佢應該已經好番七七八八喇！
李婉華農曆新年要開工冇假放，情人節當日重要做埋電台節目，不過佢噚日話放工後就會同圈外男友歎燭光睌餐。問佢想要乜嘢情人節禮物？佢就開到口話要一份可以永恒保存、得閒可以回味吓、就算分咗手都可以用嘅禮物喎！唔通佢想要鑽石？
有報道話無綫下月會裁員同減薪，外事部及節目部總監陳志雲噚日喺電視城度話：「我正式否認公司有裁員同減薪行動，啲報道唔正確。喺咁嘅市道傳出呢啲嘢，會好影響我哋軍心，總之上年一月有加薪，𠵱家亦要請人，我希望佢哋下次可以求證咗先。」
台灣組合「迪克與牛仔」嘅主音歌手老爹，噚日凌晨帶埋結他去咗中環蘭桂坊蒲。佢哋一行五人喺酒吧飲嘢傾偈，都玩得好開心，成班人直至凌晨一點幾先離開，老爹單獨搭的士走。老爹見到記者影相，不但冇抗拒，重任影唔嬲㖭！
前幾日馮仁昭個朋友喺灣仔英皇集團大廈附近嘅一間舖頭買唱片，佢睇得好入神嘅時候，忽然俾班來勢洶洶嘅男人推開，轉身睇下邊個，原來係英皇老闆楊受成。當然推開人嘅唔係楊受成，而係成日圍住佢出入嗰三個保鑣。唔知楊受成究竟為咗買邊個隻碟，搞到咁大陣仗？