華德豐（297）上次喺北京簽約後，股價不升反跌，擺明有唔少人趁好消息出貨。不過，近排股價又穩番。靚女經紀話，外邊傳得好行，話華德豐會喺短期內配股，發展衞星業務。
華德豐上周五升1.4%，收72仙，成交有成千萬銀，睇嚟有關人等正維持秩序。
靚女重話，外面傳聞華德豐嘅集資額好誇張，講緊係二、三千萬美金咁多，因要錢發展衞星業務，而呢個數目對於成個項目所需資金嚟計，只係冰山一角而已。
小初唔明白，華德豐本身債務重組重未搞掂，居然又走去搞衞星業務？雖然華德豐股價升咗咁多，但小初都係對個古仔半信半疑。
靚女繼續解畫，佢話其實華德豐老闆飛天朱自己都講到出口，話唔排除香港衞星最後會入主華德豐，所以當佢係賣殼可能會容易明白啲。
至於成件事有幾堅，真係難估，有得炒都要打醒精神。