上禮拜五美股麻麻，港股難免偏軟。三朝兩日之內搵食之道，係買些少Put輪，對象有恒指Put9066、長實Put9046、和黃Put9054。好多隻藍籌Put輪，溢價唔細，除非相關正股跌得好勁，否則唔易大升。如果上車揸Put輪，唔適宜坐盤坐得太耐。恒指上禮拜收10691，再落一關，見10500，水位有限。年近歲晚，交投會靜啲，亦有人維持秩序，唔適宜估計大市會勁跌。
唔短線賭Put輪，可以畀啲耐性，等恒指回見10500之時，趁低撈啲彈力夠嘅Call輪。
諗吓長實Call9043，隻輪頭1日掛牌最低75仙，第2日最高98仙，上禮拜五碌到73仙，上落好快幅度好大。長實（001）上禮拜收74元，吼住回落至去年11月底低位（71.75元）時，買入9043。
文化傳信（343）由53仙散到𠵱家43.5仙，再跌些少，就有機會技術性反彈，到時可以諗吓執些少隻公司輪714。714今年5月到期，現價18.1仙，溢價3.7%，槓桿率2.4倍。