由今日起嚟到銅鑼灣city'super，你就可以買到各種青森縣食品，好似佢哋嘅特產蘋果及蘋果製產品，現場重有手製燒餅、大福餅等！可以即買即食之餘，連製作過程都睇到！當中以即製即燒燒餅最受歡迎，可以睇到貌似日本Smap成員草弓剪剛的日本師傅製餅過程，想知啲餅點製記得去睇吓啦！
記者：葉少萍 攝影：周旭文
呢幾隻印有恭喜發財字眼的蘋果，專為新年而設，特登喺日本青森縣種植時，將所需字樣蓋喺蘋果面，等佢生出所需字眼㗎！
青森縣位於日本東北面，以巧奪天工的天然絕景聞名，如駒街道、是川遺迹及日本最高的三重塔等等，佢嘅工業、漁業及農業發展蓬勃，以盛產青森蘋果聞名。
呢款燒餅係青森出名小食之一，每一個青森縣人都愛吃，重係由日本青森縣來的師傅即場示範成個製餅過程，不但可以睇到燒餅係點製，而且即燒即賣，保證新鮮滾熱辣，燒餅面重加入花生、杏仁、合桃及開心果等，咬落口脆卜卜口感十足。
服務日期：即日至2月11日
服務時間：
平日(10:00am-11:00pm)
9-11/2(10:30am-11:30pm)
除了燒餅外，呢款手製大福餅都係青森縣小食之一，佢用蒸熟了的飯製成麫糰，用少許麫糰包着紅豆製成，同樣係由青森縣請來師傅即製，新鮮度十足，由於師傅製成大福餅後喺面加了少許麵粉，令飯保持柔軟度，所以入口夠軟，再加埋中間紅豆餡甜甜哋味道一啲都唔差，不過當然係即製成嘅味道會更好啦！
服務日期：即日至2月11日
服務時間：
平日 (10:00am-11:00pm)
9-11/2 (10:30am-11:30pm)
青森縣以出名蘋果聞名，呢款日本羊羹都係用了蘋果來製成，重包成一個個波形，用竹籃裝起，外觀得意，只要將膠紙除去就食得，入口似啫喱好煙韌，重有好濃的蘋果味，夠甜夠香。
呢款以日本傳統武士貌作封面的蘋果汁，係喺日本青森縣以佢哋特產的蘋果榨成，每樽每罐都含有100%蘋果汁，現場重有即場試飲，可以試飲過先買。小記當然有即場試飲，入口蘋果味夠香，味道鮮甜。
為了迎接新年，重專登製了一些揮春，貼在呢款由青森縣出的蘋果汁樽面，如新年快樂、恭喜發財、狗馬亨通、財色兼收等，買番支賀年送禮夠應節。
地點：銅鑼灣city'super
電話：25062888
日期：即日至2月15日(除即場製食品店外，即日至2月11日)
服務時間：
平日10:00am-11:00pm
9-11/210:30am-11:30pm
12/2（休息）13/2（照常）