窩輪發行商上個禮拜一終於可以再次推番啲新輪出街，令到班餓咗好幾個月嘅「輪迷」好似見番啲「老相好」咁，搵番啲精神寄託，尤其係上個星期二個市郁番之後，班散戶追買窩輪嘅情況，就好似返回昔日靠炒輪發達嘅日子。
上個禮拜有好幾隻輪喺一日之內升幾成，不過由於用咗新嘅莊家制度，就算個市無人買賣時候，班莊家都要開價，結果要為99隻新輪做對沖，當正股一有波動就要喺正股市場做對沖，令到個市畀啲輪搞到「發上發落」。
雖然話呢個禮拜嘅平均成交額都有80幾億，但聽發輪嘅朋友講，要為99隻新輪做對沖就每日要買買賣賣20億左右，扣埋啲輪嘅成交額3億幾之後，其實個市嘅成交額都係60億左右，同之前都係差唔多，所以話上個禮拜個市嘅成交活躍番，其實都重係個假象。
人哋話「生不入官門、死不入地獄」，呢句話對於做股票呢行來講特別啱聽，事關做股票入親官門肯定冇好嘢，分分鐘重係大單嘢㖭，不過如果畀人傳召上法庭作證，你就想唔入官門都唔得。近排至祥（112）單案終於開審，好多被波及嘅行家都紛紛被法庭傳召作證，韋衡有幾個朋友都係受害人，有份被傳召上庭作證，聽佢哋講原本諗住個市都無乜嘢做，所以去見識吓都無妨，不過有個朋友話等咗成日都未到佢，想聽吓其他人作證又唔得，重悶過對住個唔郁嘅市。
輪到佢上庭嘅時候，又俾班律師同檢控官窮追猛打，問嘅問題又模棱兩可，答題又只准「係」。