影音專區:<br>史提芬京封筆嚇餐勁DVD回顧

影音專區:
史提芬京封筆嚇餐勁DVD回顧

美國驚慄小說大師史提芬京,最近在接受《洛杉磯時報》訪問時表示感到自己已經江郎才盡,並打算再寫多5本小說同一部劇作之後就會封筆,相信這是各驚慄片迷嘅損失。基本上,荷李活大部分經典驚慄電影,都係由佢嘅書改編而成,佢最厲害之處,係能捕捉讀者心理,將日常生活中的事物,化作極度恐怖嘅驚慄片題材,當中經典之作包括有《閃靈》同《凶靈》等,睇過嘅人都好難唔發噩夢。

記者:馮彥彰

《凶靈》
玩超能力殿堂級之作
戲名:凶靈(Carrie)
區碼:3區
售價:約$120

最經典必睇之作,自然係史提芬京初出道之作《凶靈》(Carrie)啦!呢套電影取材自史提芬京1974年推出嘅首本同名小說,由於呢部小說非常好賣,所以被當時電影商看中拍成電影,而且搵來名導演白賴仁狄龐馬操刀。好多人都話《凶靈》呢套電影,真係能夠拍出原著神髓。
故事主要講述有一個超能力女孩——卡麗,在一次聯歡晚會中被同學玩弄,因而引發出她體內潛伏的超能力並進行報復。好多人都話呢套《凶靈》係玩超能力橋段嘅殿堂級之作,往後好多講述超能力的電影(例如《X檔案》),都有抄佢橋之嫌。

《閃靈》
巔峯之作最多經典場面
戲名:《閃靈》(Shinning)
區碼:3區
售價:約$150

1977年作品,得到電影大師史丹利寇比力克垂青,所以由大師拍出的電影,經典場面特別多。故事主要講述作家傑克帶着妻兒入住一間荒山酒店,後來傑克被酒店的幽靈所驅使,令他狂性大發,追殺自己的妻兒,再加上公路被風雪所封,變成一個困獸鬥的格局。電影最嚇人嘅幾幕包括有「電梯出血」、「鏡中反射Murder」同「雪地追逐」等,故事恐怖之餘,導演亦能利用鏡頭表現出故事的張力,真係由頭嚇到尾,絕無冷場!好多人都認為《閃靈》係史提芬京筆下最嚇人的驚慄電影。

《魅力姬絲汀》
超自然汽車四出殺人
戲名:《魅力姬絲汀》(Christine)
區碼:3區
售價:約$140

《魅力姬絲汀》都係一部講超自然力量的作品,不過今次唔係玩人,而將呢股超自然力量,賦予於我們日常生活的必需品——一輛紅色汽車之上,故事主要講述一部擁有超自然力量的汽車,懂得自己開動及四出殺人,而最變態係架車點撞都唔壞,殺人方法亦非常殘忍!筆者自睇完呢套片之後,到𠵱家都會對離遠開着「車頭燈」嘅汽車有一重心理陰影,膽小者真係唔好睇!

《伴我同行》
史提芬京都有玩溫情
戲名:《伴我同行》(StandbyMe)
區碼:3區
售價:約$200

史提芬京都唔係套套戲都咁變態,鮮有人記得的溫情及人情味極重的電影:《伴我同行》(StandbyMe)。可能大家只係記得變態嘅史提芬京,所以香港嘅DVD舖會比較少入貨,因此個賣價都會較正常為貴。《伴我同行》改編自史提芬京寫的短篇故事《TheBody》。全片最正都係可以睇到天才演員RiverPhoenix小時候嘅精采演出(原來未拍《不羈的天空》之前,已經有咁好嘅演出),可惜英年早逝。所以睇史提芬京的電影,點可以唔睇埋呢齣呢!

其他必睇經典正片
《綠里奇蹟》
史提芬京的作品不是全靠驚嚇取勝,在法蘭達拉本特美麗而出奇清潔的布景和鏡頭下,拍出一個被屈殺人,有異能的黑人的無辜慘事,是電影史上最乾淨的監獄片,卻劇力萬鈞,感人至深,自認有深度的觀眾必看。

《危情十日》
故事被安排在一個被風雪隔絕的小鎮,一個瘋狂的女書迷,將因車禍受傷的作家綁在家中,漸漸露出猙獰面目,史提芬京其實頗多以作家為主角的小說,很有自嘲味道,導演洛連納用盡所有驚嚇的手段來令觀眾從椅子上彈起,嘉菲貝絲憑本片獲奧斯卡最佳女主角獎。

《夜半仔敲門》
PetSematary曾經有國內版中文本,名字叫《寵物公墓》,我認為是史提芬京最殘暴恐怖的作品之一,硬生生將一個美好家庭搞得分崩離析,場面令人心寒,改成電影後不及原著好看,卻仍核突驚嚇,年前曾有VCD出版,現在市面應已絕版,到租帶店找找看。

售賣點:DVSHOP
電話:21949100
地址:九龍深水埗福榮街107號舖