與其話情人節溫馨浪漫，倒不如話係情侶嗌交高危日子，唔係因為今年情人節踏正初三赤口，而係各位戀人們都對此日充滿憧憬，若進餐地點或情人節禮物上稍有差池，輕則扁嘴黑面，重則連場罵戰。唔想破壞情人節浪漫氣氛，好趁現在做好準備，以下介紹的兩間餐廳，唔單止有豐富的情人節套餐，重幫你預備埋至應景禮物，而且有平又有貴，想破費多少悉隨尊便。
記者：莫麗嫦 攝影：謝耀恒、陳穎
純銀戒指
一餐定情
預訂情人節餐時，餐廳會為你訂做一對純戒指，重可以幫你同你Honey刻埋名，夠晒浪漫。
$288/兩位
用潤澤的煙三文魚做花瓣，清新的蘆笋做花莖，灑上的不是香水，而是用銀魚柳及水瓜柳做的汁，下墊香軟的牛油果，一切的甜言蜜語盡在一朵玫瑰花之中。南瓜湯內加有蓮子百合，似乎較用於婚禮菜式更合適。
試味報告：牛油果配煙三文魚，兩者味道非常配合；湯內的蓮子百合取其意頭多於增強味道。
餐廳送戒指還不夠，連主菜都做成戒指狀，應一應節。指環用甘笋同薯茸混合而成，指環上有一塊圓形牛扒，重有猶如鑽石般的帶子，牛扒戒指與手中戒指相影成趣。
試味報告：甘笋與薯茸混合之後，不但顏色搶眼，味道亦多了清甜味；牛扒肉厚而且肉汁豐富，配紅酒汁最惹味。
浪漫西餐配白酒簡直係經典組合，再用上甜蜜化身的士多啤梨做啫喱甜品，兩者都是情人節餐中的必選配搭。
試味報告：一小杯的啫喱充滿士多啤梨香，配白酒最夾。
店名：長島餐廳
地址：北角電氣道180號百家利中心1樓全層
電話：25666126
營業時間：上午11時至晚上11時
付款方法：現金或信用卡(AE,Visa,Master,Diners)
座位：110個
備註：14/2情人節當晚分晚上6時半至8時半，晚上8時半至11時兩個時段。預訂情人節餐須於11/2前親身到餐廳訂座（以便訂做戒指），並須先付每位$50按金。
贈愛情水晶
御守蜜運
餐廳特別為各有情人送出一粒愛情水晶石，黃色水晶除可以幫助運程外，更可以增強愛情運，令愛侶們更如膠似漆。
$696/兩位
接過菜單，你不難發現每道菜都有海鮮成分，就以打頭陣的頭盤和湯為例，用了蠔、蜆肉和魚翅做成。蠔是用來自法國的石蠔，兩隻生蠔配兩隻焗蠔，做成鴛鴦配搭。
試味報告：新鮮的石蠔鮮甜不腥，焗蠔內的芝士、洋葱和煙肉反而蓋過了蠔的鮮味，新鮮材料還是原味為佳。
主菜除了可以選帶子牛扒外，還有煎雞胸可以選擇。單單的煎雞胸無甚特別，重點卻落在那用荷蘭青蠔和龍蝦汁，師傅第一次嘗試以青蠔和龍蝦配搭雞胸，代替大家食到慣的燒汁。
試味報告：荷蘭青蠔的味道雖然夠鮮味，還是敵不過濃濃的龍蝦汁香，但汁中亦能見到粒粒青蠔碎，不止味鮮更富口感。
蜂巢是指從真正的蜜蜂巢取出的塊糖，此糖比蜜糖更香甜，配合熱情果所製的芭菲，酸甜味相輔相成；中間還有用蛋黃、白酒及咖啡酒Bailey's製成的忌廉。緣分的天空兩杯粉紅色特飲，專為情人節而製，同浪漫氣氛襯絕。
試味報告：咖啡忌廉入口即溶，兼有酒香在口中慢慢散發出來，分外醉人。兩杯特飲賣相遠勝一切，味道只屬一般的有味梳打飲品。
店名：Mint
地址：尖沙嘴廣東道122-126號
電話：27355887
座位：68個
營業時間：上午11時半至凌晨1時
付款方法：現金或信用卡（Visa、Master、AE及Diners）