英皇人氣少女組合Twins，今年在四個樂壇頒獎禮上，均以大熱姿態擊敗同期新人，橫掃多個「最佳組合」金獎，穩坐新人王寶座。但這對人氣雙嬌的風光背後，原來沒車沒樓沒朋友，甚至連百萬小富婆之列也未可躋身。
皇人氣組合Twins，出道至今不足一年，兩位成員蔡卓妍（Charlene）和鍾欣桐（Gillian）已極速走紅，在四個樂壇頒獎典禮上擊敗同期新人，囊括多個「最佳組合」金獎。Twins確實成名了，但二人背後不眠不休所付出的許多努力，卻未能為Twins帶來百萬財富，兩人至今沒車沒樓。
Twins這對人氣組合，要各自賺取一百萬元似乎應非難事，但年僅十九歲的細孖Charlene日前在跑馬地接受訪問時，卻嘟起嘴說：「我都想，賺到一百萬嘅話，媽咪實同我講嘅，但媽咪重未同我講喎，一百蚊我實有，一千蚊都有嘅……」
在旁的大孖Gillian即插嘴說：「邊有人同人講話自己有錢㗎？等人哋打劫咩！其實做嘢最緊要做得開心唧。」細孖聽罷喃喃道：「係呀，合理嘅，我哋重新吖嘛。」
Charlene續說：「暫時我哋都唔會諗錢呢方面，自己夠使夠食就得㗎啦。」Gillian則笑說：「我唔知點樣為之賺得多，愈諗得多就愈有壓力，賺唔夠盞唔開心，但如果我賺到一百萬嘅話，我會買車。」充滿童真的Charlene亦連忙接口說：「咁我要買樓！咦？但一百萬好似唔係好夠喎……我決定要賺多過一百萬！」
兩個女孩開始旁若無人地在發買車買樓的白日夢，呱啦呱啦地你一言我一語。
Twins過往曾多次呻窮，到今天Charlene依然自嘲是窮鬼，她笑說：「我係窮鬼嚟㗎，口靚妹吖嘛，我又冇乜自制能力，由屋企人幫我理財囉。我每個月將份糧分成三份，一份畀媽咪，一份畀媽咪幫我儲，一份自己使，唔夠錢使嘅時候就唔畀屋企人囉，我覺得我屋企人好好㗎，因為佢哋好錫我，又體諒我做嘢。」
Gillian說：「雖然我屋企唔係留低幾百萬家財，但我都未係好窮，都OK嘅，基本上我將賺到嘅錢入晒媽咪戶口，等佢幫我保管囉。」