用車報告：
鈴木Kei用家報告　有型實用易操控

自本港車壇興起一股迷你車熱潮後，到家陣都重未有減退嘅迹象，而新車款重愈出愈多㖭；當中今日我哋《用車報告》嘅主角鈴木Kei，亦係呢個熱潮下嘅產物之一。Kei憑住佢嗰個極富年輕活力感嘅造型、寬敞嘅車廂空間及不俗嘅性能表現，深受年輕車迷歡迎，因而能進佔迷你RV市場一席位。究竟車主Andrea對佢呢部Kei三門版有何評價呢？有興趣嘅朋友不妨留意吓喇。

記者：鄭達基　攝影：陳偉強

Andrea選擇鈴木Kei兩大原因

原因１　外形Cute富吸引力
擁有多年駕駛經驗嘅Andrea，喺購買現時呢部鈴木Kei作座駕之前，正想以吸引嘅價錢，去購買一部容易操控，兼且設備齊全嘅車款作座駕；而於1999年中推出嘅鈴木Kei，就正好符合Andrea買車嘅念頭，加上Kei本身頗Cute兼吸引嘅造型，好適合年輕車迷嘅口味，因而令Andrea對其心動。及後Andrea便於1999年8月以約11萬嘅價錢，購入現時呢部三門版Kei作座駕。

原因2　設備齊全性能不俗
另外，Andrea覺得Kei雖然車仔細細，但車廂內嘅設備配搭卻十分齊全，除有原廠冷氣及音響外，更備有車門電窗、門邊電鏡等設備，加上鋪排得簡潔有序，使用時亦見方便；加上車廂空間寬敞，無論係擠滿乘客抑或擺滿行李，車廂內都仍覺鬆動。除此之外，Andrea又認為Kei一台660ccTurbo引擎，亦能為其提供有不俗嘅性能表現，加上Kei本身車仔細細，睇位方便又容易，唔怪得Andrea會咁喜歡佢部Kei啦。

缺點
原裝輪胎循迹性較弱
雖然Andrea認為Kei嘅優點多過缺點，但仍有部分地方令其感到不大滿意，當中一套原裝14吋輪胎配搭，走彎時嘅對地抓着力較弱；但現時售賣中嘅KeiSport則已改換15吋輪胎，相信循迹力會較好。

鈴木Kei小檔案
日本鈴木車廠用以進佔迷你RV市場一席位嘅Kei，自於當地推出以來，一直廣受車迷歡迎；而新車於1999年中抵港時，更成為一眾年輕車迷追捧嘅對象。當時在港推出嘅Kei，備有三門及五門型號供用家選擇；另外新車除以一台660ccTurbo引擎作動力核心外，更備有一套恒式四驅系統，從而令新車能夠有不錯嘅行車表現。
及後於去年五月左右，代理方面就在本港推出咗屬Facelifted新版嘅Kei，並加有一套大包圍，以及改換一套15吋合金胎軨等配備，望落令新車倍添跑意，並將之定名為KeiSport，但可惜只有五門型號供用家選擇。

售後服務
最後，Andrea認為代理售後服務嘅表現不俗，除維修服務中心嘅職員彬彬有禮外，頗高嘅維修質素、相宜嘅價錢、交車準時及整潔程度，都係令Andrea感到滿意嘅原因之一。