醫生T性好談文說藝，文史哲無所不讀，有時左丁山都好奇怪佢點解會有時間去睇咁多書嘅。醫生T有一次說：「事在人為，話畀自己聽，日日都要讀幾十頁書，照住去做，就會日子有功。」有其父必有其子，佢位公子在哥倫比亞大學讀理科，而大學嘅要求係文理並重，學生每年要讀西方古典名著，佢個仔本來可以提早完成學業嘅，但居然唔捨得走，問老竇讀多兩個學期得唔得，醫生T一口應承，對個仔講：「我負擔得起，你鍾意讀書多啲，請便。」有子如此，皆因父親身教也。醫生T夫婦去睇香港話劇團首演《還魂香》，睇完拍爛手掌，大讚音樂編排（倫永亮）、導演毛俊輝、眾演員（謝君豪係男主角），總之乜都讚，認為香港話劇有此水準，唔算係文化沙漠。碰啱公關大姐大啲親友亦有去睇，佢哋對大姐大讚口不絕，公關靚女康妮話佢現場見到大批演藝員捧場，睇得好興奮咁話。
既然咁多人讚好，話劇應該賺錢喇啩？誰知不然，因為香港演劇場地有限，喺文化中心劇場只能做十幾日，演期好短，即使場場爆棚，啲固定成本（服裝、布景）亦好難全部收番。即係話，香港做話劇，除非演一頭幾個月，真係好難收回成本，莫講話賺錢。
點解演期唔可以長啲呢？據公關大姐大以前講過，康文署備受各方壓力，唔可以將公共文化場所批期畀一個團體太耐，以免影響其他人嘅使用權喎。