傳統名校喇沙書院今年創校七十周年，噚日就搞咗個校慶開幕禮，有唔少喇沙校友出席，其中一位係六○年畢業嘅建築署署長鮑紹雄。原來鮑署長讀中一時，同武打巨星李小龍及搞笑專家許冠文係同班同學。
鮑署長話，當年小息時，啲同學已經成日爬上屋頂玩，但「唔打會唔舒服」嘅李小龍重曳，竟撩人上附近的山頭打架，有啲出埋刀仔都俾李小龍打低。李小龍最終係敗喺一個好嚴嘅修士手上，多次俾佢用「打孖」藤條打屁股懲罰，後來重因打架而要轉校。至於許冠文，鮑署長形容佢係後起之秀，皆因「佢喺班上好靜，唔講笑」，不過一出聲，就笑到令人肚痛。
講到喇沙嘅死對頭拔萃男書院，幾乎乜運動都有玩嘅鮑署長同噚日嘅主禮嘉賓運輸局局長吳榮奎，都有同DB（男拔萃簡稱）仔較量過，喺足球隊踢開中場或後衞嘅吳局長承認，有時都輸咗畀DB仔。
下月二十三號喇沙重會喺會展搞個千人宴，當日設有「鑽石席」，要坐呢啲位，每人要捐五萬銀；捐三萬就可坐「金席」；捐一萬嘅坐「銀席」；普通位就五百八十蚊一位。有電器大王之稱嘅信興集團主席蒙民偉都係喇沙校友，唔知呢位有五十億身家嘅校友，會唔會包起幾圍鑽石席支持母校呢？
（圖）李小龍原來都係喇沙仔，不過因為打架而搞到要轉校。
E-mail：