除了沒車沒樓外，Twins還大歎為成名而失去自由。
稚氣的Charlene不禁感觸地說：「入咗行之後少咗好多自由，最唔開心係好少見到啲朋友，我好驚拖啲朋友落水，一俾記者影到就會登出嚟，你話我寫我乜都得，但寫我啲屋企人同朋友，我就好唔鍾意！」Gillian更一針見血地說：「我直情係冇見過朋友㖭呀，好慘呀。」Charlene又扁嘴說：「係啦，慘到爆，冇朋友。」
雖然Twins若有所失，但她們付出的，仍然為她們賺得豐碩的成果。對於榮升新人王，Twins異口同聲地說：「其實真係好多謝啲Fans一直支持，公司畀好多機會我哋，啲傳媒朋友又幫忙，重有好多外來因素嘅，做新人係好難㗎，所有人都唔識你，唔知你係邊個，我哋初初出嚟嘅時候，係好有壓力，成日擔心人哋會唔會接受，自己做得好唔好，都有好多唔開心㗎。」
Gillian回憶初出道時，曾在一個電台主辦的學校活動中演出，二人獻唱完畢，台下反應卻冷冷清清。
Gillian說：「當時冇人識我哋，反應唔熱烈，但當時我哋喺台上嘅情緒都跌一跌，覺得點解會係咁嘅？」
所以現時Twins雖已走紅，但即使工作何等吃力，她們都願意忍受和克服。近個多月來，Twins一直在浙江橫店忙於拍攝電視劇《齊天大聖孫悟空》，平均每星期返港一次，每次在橫店坐三個鐘頭車往機場，再坐三個鐘頭飛機返港。留港期間，Twins幾乎做足二十四小時，跟着便趕飛機返橫店，一落機隨即披上戲服，化身紫蘭和紫薇仙子，那種舟車勞頓的累，有時真令人吃不消。
對此，Charlene卻歡天喜地的說：「我覺得好開心喎，雖然我哋係成日趕嚟趕去，但𠵱家咁多人失業，我自己可以有份咁好嘅工，日日見住咁多唔同嘅嘢，好好㗎。」
Gillian也說：「星座話我唔適合做寫字樓工，成日要有新感覺嘅工至啱我做。」Charlene點頭接口道：「唔吃力係唔會有好收穫，有時勤力未必一定有成績，但唔勤力就一定冇。」