陳妙瑛（阿妙）在電視劇《無頭東宮》中，飾演醜女東宮一角。但鏡頭後，身為豐胸丸老闆娘的阿妙，卻揚言要做個事業型的完美女人，而她更不斷看書，自創了一份獨門的健胸減肥餐單。
陳妙瑛一直保持她的標準三圍（34B、25、35），她日前在銅鑼灣接受訪問時，表示除了定期服食自己的豐胸美肌丸和塗豐胸乳液外，她還苦讀各類營養書籍，將不同的豐胸減肥方式集大成，研製出健胸減肥的獨門餐單。
阿妙說：「其實多食西生菜、豆類、膠質食物、飲鮮奶，都係對豐胸好有幫助，但做適量運動配合會更好，例如每日做二十下掌上壓，又可以試吓每日用手將腋下嘅脂肪、腹部甚至背側嘅多餘脂肪，推向胸前，呢個動作能夠將游離嘅胸脂集中番。但記緊用花灑沖涼嘅時候，唔好將水直接射向胸前，因為咁樣係會令肌肉鬆弛。」
陳妙瑛說：「我覺得減肥要配合埋運動，譬如每個禮拜做三次半小時嘅帶氧運動，即係跑步、游水或者跳繩，可以有助收緊肌肉。另外，每日起身最好先空肚飲兩杯水，每日至少飲八杯水，飲水對腸胃係非常好嘅。
「東方女性普遍有腿粗嘅現象，每晚用一匙粗鹽混和溫水浸小腿十五分鐘，可以去腫同消除疲勞。瞓覺嘅時候，用枕頭輕微托高雙腿，啲血就唔會聚晒喺腳度，第日起身都冇咁腫。」
陳妙瑛表示未來會專注發展她的豐胸王國，但她從來沒想過退出娛樂圈，她說：「如果有啱嘅劇本同時間，我仍然會返無綫拍劇，𠵱家我會將成副精神擺落盤生意度，向healthyandbeauty（健康與美容）進發。我嚟緊重有好多大計，但呢啲係商業秘密，總之喺工作上，我一定會同TVB嘅口號一樣，全力以赴，做到最好。」
採訪：朱芷瑩
攝影：陳志嵐
協力：羅慧敏
場地提供：COR
服裝提供：連卡佛
化妝：JanaeChan（Beautytech）
髮型：WardenLuk（IlColpo）