深圳除熱愛LiveBand嘅酒吧文化外，現時亦掀起一股民族主題酒吧熱潮。一間以西藏作主題嘅「扎西德勒吧」近日擴充營業，Bar內除經常有藏族民間歌舞表演外，環境及食物亦別樹一幟。另一家富蒙古色彩嘅「草原戀餐吧」於近月開業，大家既可感受內蒙古民族嘅熱情，亦可享受其特色飲食。兩間酒吧均各具特色，必會成為喜歡北上蒲Bar嘅港人新蒲點。
記者：梁煒健
攝影：黃子偉、陳盛臣
扎西德勒吧
因擴張而搬遷到紅嶺中路嘅扎西德勒吧，喺新址將近兩個月，地方約500平方米，可容納200人。酒吧以西藏作主題，整個場地均以喇嘛佛寺內嘅裝修作布置，真係有如置身西藏佛寺一樣。除咗環境有feel之外，每晚都不停有大型民族歌舞表演，最抵死係呢類民族歌重好似Rap流行曲，聽落非常親切動聽。藏族以牛肉為主，「牛魔王」一族嘅食客一定要試試其地道美食。啤酒消費便宜，只消?20一支，喜歡另類酒吧嘅朋友必然要到一到。
草原戀餐吧
新開業不夠一個月嘅「草原戀餐吧」，堪稱深圳第一間以內蒙古作主題嘅酒吧，雖然地方只得400平方米，但晚晚高朋滿座，加上蒙古人一貫熱情招待，嚟呢度玩嘅朋友，即使打烊後均開心到唔捨得走。既以內蒙古作布置，除有一間非常別致嘅蒙古包作外形嘅卡拉OK房外，大廳亦經常有蒙古民族歌舞助興。美食方面亦不乏有其蒙古烤羊腿及特飲。家陣毌須去到蒙古就可以歎到正宗蒙古美食，大家今日放咗工重唔即刻約埋三五知己，一齊去「草原戀」玩番晚！
鬥節目
鬥美食
鬥環境