讀者Eric問：
本人最近購入一部二手平治C-Class，發現每次煞車時軚盤都會震動，如果急煞的話成部車都會震㖭，但煞車距離並無改變，請問咁樣是否有需要修理？原因又係咩呢？
Eric：
以你嘅情況睇嚟，應該係前輪煞車碟已出現變形，當煞車時就會出現震動；而煞車碟變形可大致分為兩個原因，一係經常緊急煞車，令煞車碟長期處於高熱之下，當超出可抵受嘅溫度時就會變軟而變形。另一個原因係一冷一熱，有好多車主都會將座駕駛到清水灣或石澳等有洗手間嘅停車場洗車，甫停車便立刻洗車，大家須知道喺呢啲路斜彎多嘅行車過程中，制動系統係於高溫下工作；如停車後立刻用水潑在煞車碟上，煞車碟就會遇冷收縮而變形。至於你話並無影響煞車距離，其實係大錯特錯，因為用一隻已變形嘅煞車碟作制動，煞車皮嘅損耗會頗大，加上只係輔助真空煞車泵幫你一把罷了；若果唔修理的話，除會縮減煞車皮嘅壽命外，重會令制動系統過熱而失靈等等，嚴重者更有可能釀成意外。所以為安全着想，你都係快啲送部車去修理啦。
如果大家對汽車有任何問題，可傳真或郵寄畀我哋，我哋會盡快為你解答。
傳真：27420542
郵寄：香港將軍澳工業邨西駿盈街八號《蘋果日報》副刊「車天車地」版「汽車Q&A」收