由真人真事改編嘅電影名作《盜亦有道》，相信唔少讀者都睇過。片中由雷利奧達飾演嘅小伙子HenryHill加入黑手黨，夥拍羅拔迪尼路同祖．柏西三人迅速崛起，可惜一輪風光最後淪落到要接受FBI保護證人計劃保存性命，橋段同以下介紹呢隻新PCGame《Mafia:TheCityofLostHeaven》非常相似，可以講係黑幫遊戲中嘅反面教材。
文：李淮
發售日期：2月26日
發行：GodGames
開發：IllusionSoftworks
《Mafia》是一隻第一身射擊及動作遊戲，故事發生於幻想城市LostHeaven，從城市建築和人物所見，不難發現LostHeaven是以30年代的芝加哥和紐約作為背景，內裏重有唔少著名地標同區域，好似唐人街、小意大利同曼克頓區等，資料搜集非常認真。
遊戲中玩家所扮演的TommyAngelo原本只係個平凡的士司機，一次誤打誤撞接載黑手黨逃避追殺，竟被人誤以為是幫中「駁腳」而慘被牽連，最後惟有半推半就加入黑手黨，唔揸的士轉行揸槍兼做駁腳！
由於Tommy仔最初只屬幫中二打六角色，所以遊戲首部分任務亦會以駕駛為主，不過工作就唔止普通司機咁簡單，因為你要接載班大哥去打劫同埋殺人放火，做個真正嘅「駁腳」，所以反應一定要快，識得點樣避開差佬注意，盡量低調行事；俾警車追嗰陣手車又要夠辣，同埋揀最短嘅路線。隨着你有出色表現，家族中頭領DonSalieri亦會開始對你委以重任，總之乜都預埋你，Tommy亦變得愈來愈心狠手辣，最後重成為家族核心成員，十足十翻版HenryHill。
除咗揸車之外，其實遊戲大部分時間都會以第一身視點進行，其中以刺殺任務最多，而且真實感非常強烈。如果想刺殺任務做得乾淨利落，就一定要在冇人知的情況下潛入，然後等目標人物不為意時落手（例如上廁所及睡覺時），至於點同佢埋單，就完全由你揸主意，正常情況下壘球棍就最啱使，不過鍾意黑幫仇殺Feel嘅玩家，亦可以用槍指住佢個頭近距離處決。
做得黑手黨，實在好難避免幫會間嘅衝突。喺某些Mission入面，玩家便有機會和敵人在街頭駁火，不過就唔使一打十咁踢腳，因為你身邊將會有一班由AI控制嘅手足撐住，雖然未必咁幫得手，但勝在震撼場面搭夠，等你親身投入如同電影中嘅黑幫世界，比睇戲更加真實，所以話呢隻Game真係唔玩唔得！