昨日沈德寶莉國際美容健美中心中環和銅鑼灣兩間舖都落閘不做生意，正門貼上告示稱因內部重組要至下月十六日才重新營業，有不少顧客摸門釘後擔心該公司執笠，亦有報販上門追數。而約四十名美容院員工昨日到勞工處尋求協助，追討欠薪。
自去年年尾開始，沈德寶莉國際美容健美中心經常傳出財政不穩的消息，包括欠租、欠債、欠薪和扣員工薪金當借錢等（詳見附表）。昨日沈德寶莉旗下的中環和銅鑼灣美容健美中心均沒有開舖，事前更沒有通知公司的會員。
記者昨日下午去到銅鑼灣總店，健美中心沒有開門，門口更貼出告示，稱要內部重組所以停止服務，至下月十六日才回復正常服務。
此時一位姓鄧報販上來收數，他表示健美中心每日訂八份報紙，包括三份《南華早報》、三份《蘋果日報》和兩份《明報》，由九月份至今一直未找八千元數。
另一位擁有貴賓會籍的黃小姐亦摸門釘，她說：「我join咗五百幾個療程，樣樣有啲，每個二、三千蚊，都成十萬銀，佢寫住暫停營業啫，唔係執笠吖嘛！我之前問過職員間公司係咪唔掂，初時佢哋話冇咁嘅事，但呢幾日又轉口風話無可奉告，叫我多啲上嚟，但好難book，唔係話滿咗，就話師傅手指痛做唔到按摩，今次暫停營業，完全冇通知過我。」
而中環的分店亦一樣，顧客Grace向記者投訴說：「我今日book咗上嚟做facial，我入會係因為呢度有得做facial又有得做Spa好齊全。而且可以分期付款，我啱啱先至供晒，咁對我哋好冇保障，我實會叫埋啲朋友一齊去投訴。」
不少圈中藝人都是沈德寶莉健美中心的會員，其中章小蕙和梁琤是貴賓會籍，江希文是普通會員。
章小蕙昨日接受本報電話訪問時說：「佢（沈德寶莉）係我好好嘅朋友，佢搞成咁都係受𠵱家經濟大氣候影響。𠵱家做生意邊個唔辛苦，自己搵到兩餐又可以打開門口做生意已經好好，以前人哋成日以為我係金礦，但其實有苦自己知，我同佢都係單親家庭有仔女，可以令到仔女三餐無憂其實都已經係好奢侈嘅事。」
而梁琤則對事件毫不知情，她說：「係咩？我完全唔知，亦冇人通知過我，我重有六十個course未用，每個二、三千蚊，我一次過畀咗三年會籍嘅錢，每年萬幾蚊，𠵱家只係過咗一年，不過佢有畀折頭我嘅，都損失五位數字㗎。」
記者昨日致電沈德寶莉，至截稿前亦未有回覆。而約四十名沈德寶莉國際美容健美中心員工，昨日到勞工處尋求協助，向公司追討欠薪，其中一名被拖欠三萬多元薪金的員工表示，員工已有兩至三個月未獲發薪。
採訪：馮美茵、梁錦雯、盧雪琪、張止寒