政務司前司長陳方安生退休後，魅力絲毫未減，無論同學生對話定係喺街邊賣曲奇餅，一樣吸引唔少市民圍觀。前日就有人向八方報料，話見到陳太同民主黨十二名大漢喺蘇浙同鄉會食飯，而且重有雜誌到場影相。
聽講無官一身輕嘅陳太席間談笑風生，講吓退休生活同今日香港大勢，咪以為陳太退休好得閒，原來有不少機構想請佢演講，時間已排到密麻麻，重有一啲係來自祖國機構，不過就唔係講政治，反而係講吓企業管理，對管開十八萬公務員嘅陳太嚟講，簡直係易如反掌！
至於陳太未來去向，聽聞亦有多少眉目，𠵱家陳太正諗緊幾個選擇，其中一個係同從事教育事業有關，今次唔只係得閒去同師妹傾偈咁簡單，而係更加投入，陳太亦好肯定咁講，唔理做乜好，佢一定唔會重返政壇，我諗老董聽到呢句就最放心喇！
E-mail：