一味窩輪:兩隻新地Call跌幅大

一味窩輪:兩隻新地Call跌幅大

又係1個好友失望嘅交易日,恒指雖然跌幅唔大,但窩輪炒友輸多過贏。
9字頭嘅新輪,新地(016)有兩件Call跌得較勁,9042散14%,9010散13%,雙雙打入10大死火榜。新地下跌2%,兩隻Call輪跌幅係正股跌幅7倍。
9042今年8月底到期,現價36.5仙,溢價20.5%,槓桿率16.8倍。9010亦係8月到期,現價87仙,溢價9.6%,槓桿率7.1倍。
新地跟隨大市軟順,估計60元邊守得住。再跌些少,可以酌量執啲Call博反彈。揀對象,應該避開溢價過高嗰類,槓桿率大都係咁話。
9010靚過9042好多,吼住喺80仙左右上車。
𠵱家已經掛牌嘅9字頭新輪,總共有94件,喺大利是機螢幕上都有個@符號,代表唔使畀印花稅。

9字頭輪免印花稅
簡單講,凡係代號4個阿拉伯數目,頭1個字係9嘅話,都唔使畀印花稅。買賣成本來回計只係0.52%。幾毫子嘅窩輪,1個位已經有錢賺,肯定未來炒輪會好熱鬧,唔會一潭死水。