港股噚日抽高後就俾人質番轉頭，沽盤重係相當之有韻律，每隔一段時間就出現，而且沽親都係一籃子貨沽出。不過，Cookie話其實唔關外資撤出事，而係中資趁農曆新年前減磅套現回國過年，所以令到大市反彈不得。中資流入容易流出難，就算喺香港賺到盤滿缽盤，都好少會流返國內，一般都係等監管機構發爛渣，中資才會死死氣流返入國內。
瑞源國際（476）噚日朝早炒得好地地，股價一度升至0.021元，但其後傳出有莊家冇錢找數，破壞隻股升勢，傳聞有莊家所持股份被證券行拋售，令股價倒跌31.3%，收報0.011元。另外市場又傳出瑞源有意供股，嚇親街坊，觸發莊家大舉拋售。
信德（242）噚日突然急升26.6%，成交高達6175萬元。傳聞此股旗下持有5%嘅澳門旅遊娛樂一定會獲得賭牌。其實澳門旅遊娛樂一向都係開賭為主，信德只持有澳門旅遊娛樂5%，基本上冇咩賭牌嘅概念，反而佢旗下寶翠園開售，高達60億元資金回籠，重值得留意。
華人置業（127）宣布向金匡（286）注資，一度惹起市場揣測究竟係咪大劉又走去救羅兆輝嘅金匡。
不過阿虎睇真啲，華置只向金匡注入貨倉與工廠物業，就取得可兌換金匡逾33%股權嘅可換股債券，大劉至係今次交易嘅大贏家。華置收市升4.2%，金匡跌7.7%。