美股連續兩日大幅回升，杜指更逼近50日線（9938）阻力，一旦衝破，走勢將現轉機。不過，呢兩日恒指走勢都係先升後跌，雖然話跌幅唔大，但反覆尋底勢頭冇變，令一般投資者都唔敢輕易入市，擔心港股唔跟美股升，可能有壞消息跟尾。
其實噚日冇咩特別壞消息，只不過係淡友借日圓弱勢壓住港股。照計藍籌走勢唔會咁差，唔通啲窩輪發行商諗住Call輪難賣，轉頭質散個市，賣咗啲Put輪先？不過睇番東亞銀行（023）近3日嘅表現，市場對藍籌公布業績似乎充滿戒心，東亞3日共跌1.40元，跌幅8.3%，而且成交一日大過一日，反映沽壓愈嚟愈重，下星期二公布業績前，相信都唔慌有反彈。
近期唔少大紅籌及大國企股價波動，主要同發輪有關，好似趙飛雲愛股之一嘅上海實業（363）呢個多禮拜走勢認真波動，暫時睇到50日線14.60元有唔錯支持，可以買番啲。如果諗住揸中線，14元附近已經買得過。