好姨薛家燕為拍《皆大歡喜》不惜犧牲色相，拍一場和電影《美麗有罪》相似的玫瑰花瓣出浴鏡頭。好姨表示拍過出浴戲後不再抗拒，更希望兩年前曾被她推辭的沐浴露廣告可以再找她拍。
好姨薛家燕日前在電視城為電視劇《皆大歡喜》拍攝一場出浴戲，講述好姨發夢見自己正在享受沐浴之際，突然間丫環走入來倒沙落她的沖涼盆，嚇得好姨整個彈起。
好姨拍這場戲時氣溫只得十度左右，她前日接受電話訪問時說：「其實我好怕拍呢啲戲，驚會穿崩，好尷尬，監製徐遇安不停向我派定心丸我先肯拍，閒雜人等當然唔可以留喺度啦。雖然天氣凍，但無綫安排得好好，工作人員不停幫我加熱水。」
好姨的沐浴盆內放了不少玫瑰花瓣，簡直可以媲美電影《美麗有罪》中女主角敏娜蘇華莉（MenaSuvari）的出浴戲。
不過好姨卻說拍攝時不覺浪漫，她說：「拍完之後個人皺晒皮。呢場戲下個禮拜出街，我希望收視可以高幾點啦，但呢啲戲真係唔好再搞我啦，成日拍會凍親㗎！」
原來兩年前曾有沐浴露廣告找好姨拍，同樣有出浴鏡頭，但好姨怕尷尬而推掉，她說：「個廣告係講我沖沖吓涼跌咗嚿番梘，然後伸隻手出去執，當時佢哋畀我七位數字嘅酬勞，但我都唔敢接，𠵱家我拍過之後，又唔會太抗拒，所以我希望個廣告商可以搵番我傾啦！」
此外，好姨昨於牛頭角派米予七百多名老人，婆婆見到好姨時說：「你好似廿幾歲，好靚喎！頭上嗰粒癦好嘢，見到你好開心！」哄得好姨歡喜非常。
採訪：比華利