最近有朋友同馮仁昭講，話佢有兩次見到王晶喺將軍澳新都城出現，兩次佢都係喺停車場準備揸車走人。呢位朋友就問馮仁昭：「乜王晶住喺嗰度咩？」
馮仁昭知道王晶梗係唔係住喺將軍澳，但住喺王晶出現嘅新都城，就有亞視花旦陳煒。陳煒之前拍王晶監製嘅電視劇《美麗傳說》時就傳過緋聞，最近咁啱又俾人撞到王晶喺陳煒所住嘅大廈出現，都幾啱喎！
唔知王晶係探朋友，定係探陳煒呢？不過就算探陳煒都唔出奇，大家點都算係賓主一場，唔係吓吓都要諗埋一邊嘅。
最新一期嘅《壹週刊》報道，話有個叫裴唯瑩嘅十三歲新人，做鄧麗君接班人，演出以鄧麗君生平為藍本嘅音樂劇。雖然女主角已塵埃落定，不過馮仁昭知道搵裴唯瑩之前，原來佢哋曾經搵過容祖兒試鏡，不過最後傾唔成嘅原因，係因祖兒嚟緊要出外進修，又要出碟，根本唔可以抽兩個月練音樂劇。
不過馮仁昭都有向呢個音樂劇嘅監製徐正康打聽吓，佢話除咗接觸過祖兒，都有搵過其他女歌手。
翁嘉穗上個月生日，同老公鄔友正走咗去跑馬地Amigo高級餐廳食飯慶祝。兩個人趁機享受吓二人世界。雖然翁嘉穗同鄔友正結婚三年幾，但佢老公依然好浪漫，喺翁嘉穗生日嗰日，送咗件鑽石首飾畀老婆做禮物，真係羨慕死人。
金慧英喺尖沙嘴加拿芬道開咗間精品店，佢同馮仁昭講，話間舖嘅sales噚日放咗假，所以佢親自落去睇舖。
點知有個後生仔趁佢招呼緊其他客嗰陣，偷咗佢部手提電話，臨走重話轉頭再嚟過。金慧英發現唔見電話即刻報警，但就捉唔到個賊，佢同馮仁昭講話當係破財擋災喎。
鄭中基老竇、環球唱片亞太區主席鄭東漢，成日被傳會離開環球。馮仁昭收到消息，話鄭東漢的確另謀高就。MTV台嘅母公司ViacomInc.將會成立一間好大規模嘅娛樂公司，諗住重金禮聘鄭東漢過檔。
鄭東漢重準備搵埋正東嘅黃栢高一齊過檔，如無意外幾個月後會傾掂所有細則，佢哋𠵱家同滾石唱片傾緊收購細則，希望喺呢間公司成立之後可以有一班具實力嘅歌手，同埋收購滾石。
施念慈事業愛情兩得意，佢啱啱結咗婚，最近又出咗本《候選A-情人》新書。不過施念慈因為籌備婚禮操勞得滯，呢兩日病咗，前日連聲都開唔到，所以返唔到新城做節目，要監製幫佢頂住先。噚日施念慈同馮仁昭通電話，話睇咗醫生，應該只係感冒，冇乜大礙。
黎瑞恩嘅告別個唱一路話會搵嘉賓，好多人重以為佢一定會搵番以前寶麗金小花劉小慧同湯寶如，但馮仁昭就知道呢兩個老友一定唔會上台同黎瑞恩演出。事關！