上星期日天寒地凍，最多人食火鍋──打邊爐。上星期六有一隻新馬出賽，個名好得意，就係叫做「打邊爐」，英文叫ShabuShabu，個名就得意嘞，不過資深馬迷都覺得，呢啲馬名，唔易贏馬。天氣唔夠凍，點會打邊爐呀，一年只有機會贏一次，夏季就唔好預佢！以前有一隻馬叫「生辰快樂」，因為一年得一次生日啫，果然係一季至多贏一次；馬主後來得另外一匹新馬，改名為「快樂年年」，𠵱家重跑緊，好似贏過五次！
沙田陳師奶上星期日到街市買魚、魚蛋之類，預備一家打邊爐，街市檔主對佢講：「陳師奶，乜咁耐冇嚟買餸，多啲嚟啦，我哋要靠多啲熟客生意先至捱得住呀，而且多啲返屋企煮飯，既健康，又慳錢，喺酒樓食飯多味精呀！」陳師奶為之啼笑皆非，買完餸就走人，轉頭碰到一間相熟酒樓企堂，企堂講：「唉，陳師奶，點解咁麻煩要自己煮呀，今晚嚟我哋度啦，唔使咁煩噃！」
酒樓同街市爭客，好似前所未聞，但急景殘年之際，企堂為自己飯碗着想，亦不得不多口為酒樓拉客。陳師奶一位朋友C係九龍城廣場內某酒家嘅熟客，前星期朋友C到該酒樓食飯，部長猛咁sell叫年晚要捧場，朋友C唔鍾意部長太囉囌，點知部長索性話：「以前好景我成日同你留枱打尖，𠵱家算我打你心口啦，嚟幫襯啦！」朋友C為之愕然，亦感到唔好意思，決定拉隊去食番一次。