97前歌舞昇平的香港，令來自破碎家庭、無學歷、無背景的阿強，可以憑着替人做黃色架步負責人(Keeper)而賺到周身名牌，還染上一鋪賭博癮。金融風暴後，黃色事業風光不再，為了要逃避賭債，他只好改行做廚房、清潔、地盤等工作，甚至要瞓街度日和攞綜援。去年重遇救世軍露宿者援助中心一名社工，在他的協助下，阿強重新振作，擺脫以往生活，做個自力更生的有用人。
記者：曾順珍 攝影：陳智良、林栢鈞 鳴謝：油麻地救世軍露宿者援助中心
身材略胖，自言性格火爆的阿強，18歲加入14K社團做口靚，曾受聘為旺角砵蘭街一帶的Keeper，最高峯每月賺兩萬多元。現在他是中港兩地速遞員，甘為六千多元而行到腳趾長出水泡。
「呢份工係個朋友介紹我做嘅，主要係將文件或貨辦由香港運送到深圳，然後又由深圳運回香港，一轉可以賺$25，如果一日可以跑十轉，我又開足工的話，我想一個月大約都有$6,500，好過攞綜援吖（約有$4,200）。」阿強操着不太純正的廣東話說。
做中港速遞員的首要條件，是要行得又餓得，因為阿強話前一天他行了八轉，腳趾居然長出水泡，而且還要捱到夜晚11點才可食晚飯。
「咪當減肥囉！我遲啲會搬去深圳住，因為有個朋友幫我搵到一間約200平方呎嘅屋，月租都係$700，我諗份人工都好夠我使，重可以有錢儲。」
31歲的阿強，似乎是到現在才開始享受務實工作的樂趣，因為金融風暴前，他都是靠做Keeper（即替死鬼）為生。當有差人到架步找負責人查牌時，阿強便要挺身而出。如果有甚麼事，更要一個人攬晒上身。
「我做咗8、9年，從未試過斷正，因為每個場我只會做幾個月，只要喺差人上來查牌前辭職就得。那時嘅收入唔錯，每個月都有兩萬幾蚊，最旺試過一晚有百幾個客。生意好時，一個月都有五百蚊貼士。」
因為搵錢容易，只要靠把口𠱁到客人開房便行，所以阿強那時使錢亦很疏爽。年輕人喜歡的名牌他都會買，如Levi's、Polo等，三、四千元的手機隔數月便換一款，每月閒閒哋用上三數萬元。他曾擁有一隻二手金勞及價值四萬元的鑽戒，不過統統都在97年時當晒。
98、99年經濟不景，黃色事業亦受拖累，阿強謂每晚去尋花問柳的人寥寥可數，就連肉金亦要講價。加上不少人喜歡北上尋歡，貪其質素高過香港，而且收費平，所以一晚有40個客已經算唔錯。
「那時貼士又無，人工又大跌，由兩萬多減至得九千蚊；加上自己又欠下砵蘭街貴利和馬伕數共12萬元，心想再在砵蘭街做落去博唔過，於是惟有轉行避鋒頭。
「我試過為咗避賭債而轉到快富街嘅架步做，唔再喺砵蘭街蒲頭，但都唔係辦法，因為試過一次喺旺角見到一個馬伕債主，於是立即掉頭狂跑，幸好無俾佢見到。」
在朋友介紹下，阿強到一些五星級酒店做廚房睇單，佢話手下有唔少𡃁都聽佢點，月入都有萬二蚊。但做了幾個月後，因為屈在廚房裏實在太辛苦太熱，於是在朋友慫恿下，他又轉行到先達賣翻版四仔VCD。
「個朋友話每個月可以賺一萬蚊做得過，於是做咗20日，被差人拉咗兩次，最後坐咗6個月監。」
出監後，阿強做過清潔、裝修工作，但多是散工和不穩定，每月大約可賺$6,000。
「嗰段時間我居無定所，曾經瞓過善導會嘅宿舍、板間房甚至尖沙嘴文化中心街頭，無嘢做時就攞綜援。最灰嘅時候我有想過燒炭死，但最後都唔夠膽而放棄……幾窮要瞓街我都無所謂，一個男人食到邊瞓到邊，但點解連搵份自己鍾意嘅工都咁難，我都係要求五、六千蚊啫。……我唔想再過以前嘅生活，但唔明點解人哋可以改變而自己就唔得。」阿強皺着眉頭說。
其實阿強曾經有自殺紀錄，他曾經試過用𠝹刀𠝹手腕，又在上年十月因食40粒安眠藥而要入院洗胃。
「可能因父母離婚影響，我個人性格好孤僻，現在連最好嘅朋友都染上毒癮……我最想就係返上內地生活，因為可以離開以前嘅圈子重新做人，最好可以搵到個正式嘅女朋友，傾訴所有唔開心嘅事……」
去年十月尾，阿強重遇早年相識，曾經輔導他的救世軍社工許生，在許生協助下，阿強入住救世軍的單身宿舍，他不諱言是救世軍把自己救活的；最近他還找到一份自己認為理想的速遞工作。
「噚日喺羅湖見番個架步老細，佢話我做乜搞到咁慘要做速遞，重叫我幫番佢手，但我想每日得$300，又要搵命博，真係唔制。𠵱家我連搭車錢都係老細畀，一個仙都唔使出，幾好吖！」加上阿強喺大陸又搵到一個不嫌他窮的女友，生活對他似乎是充滿希望。
認識阿強有七、八年的救世軍社工許生話，阿強的性格已改變不少，由從前的囂張，變為現在的成熟、穩重，他覺得市場環境令阿強不能不面對現實。
「現在做睇場只得八、九千蚊一個月，賣翻版每日得二百蚊，俾人捉咗要坐6個月唔值得，所以令佢唔可以再走回頭路。……所謂經一事長一智，撞過板就自然會行番條正路。現在算不錯了，起碼他已經肯搵份正經嘅工做。」
許生更指出救世軍露宿者援助中心的宗旨，是協助願意改善生活的露宿者脫離露宿生涯，重新融入社會。
曾經聽阿強話很想脫離以前的生活，遠離以前的朋友圈子，但當問他喜不喜歡現在的工作，他無可無不可的回答：「如果唔係市道咁差，我一定會做番以前嗰行，起碼舒服好多。」畢竟要忘記以前的風光，重新建立新生活，是要有無比的毅力，不是說得那麼輕易。