唱歌捱鬧冧到震
黃貫中狠批朱茵「唱得衰」

在朱茵口中，黃貫中除了是生命中的最佳男朋友，也是其知己。朱茵即將重出歌壇，作為其唱片監製的黃貫中，曾批評女友有時唱得好衰，但朱茵對男友的評語依然冧到痹。

朱茵已兩年沒有出唱片，今年她決定重出歌壇，由自己及其經理人公司投資製作唱片，男友黃貫中（阿Paul）則擔任監製，錄音完畢才交由唱片公司發行。

「會信晒對方」
朱茵與阿Paul雖然是情侶，但是次背負監製重任的阿Paul，卻對女友錄音大公無私，兼且要求特別高。朱茵日前在中環接受本報訪問時說：「我唱歌係有不足嘅地方，有時我去錄音，佢會話呢度唱得好衰，大把嘢要改。咁我知自己問題喺邊，我會變，佢畀評語我，但我哋唔會有拗撬，因為我唔識，有乜同人拗吖？我同任何人合作都係咁，自己唔識嘅就會信晒對方。」

「音樂感動人」
朱茵續說：「我對呢次出碟好認真，重會用事實話畀人聽，我唔係玩玩吓。雖然𠵱家做歌手好難，但我嘅自由度會比較大，自己揀歌，唔鍾意咪唔唱囉，想錄音時就閂埋門專心唱歌。唱歌係我嘅興趣，我希望用音樂去感動人。」

「結婚唔簡單」
朱茵在工作上能夠做到自己喜歡的事，難得是她連愛情也同樣得意。問她阿Paul算不算是她生命中的最佳男朋友，朱茵連連點頭，還笑說：「佢都係我一個好好嘅朋友，有如情人知己，佢好照顧屋企，我相信佢重會係個好老公。」
那麼阿Paul是不是被朱茵認定的結婚對象？她笑說：「嘩，呢個問題有啲嚴肅，我對拍拖好認真，亦都只會拍一個人，總之我絕對唔會突然之間結婚，因為結婚實在係一件唔簡單嘅事。」