小初今次被人老點，媒體伯樂（8072）上市破底，就一早係意料之內，但估唔到街外冇咩人有貨嘅科瑞控股（8109）都咁肉酸破底收場，最低見80仙，最後收89仙，較招股價90仙跌咗1.1%。
經紀陳猛話唔使驚，神州醫療（8186）上市首日夠跌穿招股價，但之後就即刻彈番上去，重炒到識飛咁滯。
不過，如果大家有細心睇真，科瑞臨收市時，89仙掛牌嗰4個雷記嘅牌，買盤總數只得1.6萬股，平均計每個盤只得4千股，似乎好冇誠意。
另外，好耐冇出現嘅經紀黃，向小初推介寰宇國際（1046）。隻股早排一度上過去最高71仙，但試高位後開始回落，近兩日先至好番多少。
經紀黃話，寰宇因為有班機構性投資者揸咗，所以去年12月中開始櫥窗粉飾，順勢炒到今年1月中至出現調整。聽講公司最近好似有多少嘢搞，唔排除調整完會再炒過。