港股上午都升得好地地，阿虎以為自己又睇錯市，下午沽盤湧現，大市輕微倒跌31點收市。
噚日又傳出有資金由港股流出，因為嫌港股太貴，但個市又跌唔落，大家都應該知道大市點解跌唔落，唔係因為佢平，而係因為供應太少，唔少貨源重係俾官股鎖死咗。其實𠵱家太平盛世，庫房又等錢使，港府不如放晒啲貨出嚟增加市場流通量，令到外資消除戒心，或者可以造番旺股市。
聯洲珠寶（926）噚日有證券行入市頂價，股價上升23%，尾市沽盤亦被掃清，收報0.149元，不過成交就相當有限，只得14萬元咁大把。Cookie話此股暫時冇料到，只係幕後喺度搭棚，如果真係有沽盤殺到，相信可能要跌番轉頭。
馬聯香港（542）大股東將要喺一個月內減持近8000萬股，以維持公眾持股量符合25%嘅要求。聽講大股東本周二已開始沽貨，試吓市場嘅承接力，結果當然係冇咩人肯接貨啦。
不過，黑客話大股東好似已經搵到人肯幫佢包銷，不過𠵱家重未決定係配售新股集資，還是淨係大股東減持就算，但相信好快就會有人為隻股維持秩序。
敦沛金融（812）上市第二日跌幅擴大，噚日收0.78元，較招股價1元低22%。黑客話隻股好快就會歸邊，跟住就會開車。阿虎問佢目標價幾多？佢就話咪要求太高，上番招股價都執28%，算唔錯啦。