汽車專題：
農曆新年6大扺買車款

農曆新年將至，各大汽車代理為吸引買家，除咗有常見嘅減價行動之餘，重會有各項優惠，如送牌費、送油券甚至送其他禮物等等，可謂奇招百出。今日我哋特別為大家挑選咗六部至抵買嘅車款，並為大家簡單介紹一下呢六款車有何購車優惠，好讓大家喺買車前可以有個參考。

記者：鄭達基

1　萬事得
買323送禮至多
有乜優惠：雖然屬2002年製造嘅323，新車售價較前略為調升（售$98,990起），但買車嘅優惠卻多不勝數；除咗部車本身有齊各項豪華裝備，如真皮座椅及天窗等等外，更會送你入油優惠、名貴音響禮品，兼且重會包你2年偈油及原廠萬事得偈油隔，係咪好吸引呢？咁重唔止呀，大家重可以$25首期出車㖭，係啱嘅重唔行快步去陳列室查詢一下！

2　豐田
$28首期出Corolla
有乜優惠：至於豐田方面，佢哋至受歡迎嘅Corolla家庭房車，亦有為選購嘅用家提供多項優惠；其中屬Corolla豪華版嘅現貨型號，除咗有齊真皮座椅，以及桃木裝飾等豪華裝備之外，售價更只係由$119,900起，另外出車重會送你代用券，同埋只需$28首期就可以出車，可謂十分超值。

3　本田
買Civic現金回贈$12,000
有乜優惠：近排憑住Jazz而人氣急升嘅本田，亦有為選購旗下各個車系嘅用家提供多項優惠，其中Civic至為吸引；皆因新車嘅售價，除為$109,800起外，家陣如果你選購現貨型號，更可獲得$12,000嘅收車優惠或現金回贈。

4　福特
Focus唔使12萬
有乜優惠：自推出以來，一直備受各界車迷推崇嘅福特Focus，除咗造型吸引、車廂空間寬敞實用之外，就連售價亦非常吸引；𠵱家Focus嘅售價僅為$118,800起，另外出車重會送你豪華真皮座椅、$2,000大利是，以及$1,500汽油優惠㗎。

5　日產
Cefiro減價兼送牌費
有乜優惠：一向廣受用家歡迎嘅日產Cefiro，喺農曆新年前亦為有興趣嘅用家，提供多項優惠；其中至吸引嘅，就係現貨Cefiro2.0嘅售價，由原來嘅接近20萬元，調低至現時嘅$179,980起，減幅接近2萬元；另外選購現貨嘅Cefiro，重會送你首年牌費㖭。

6　三菱
Lancer減價再送油券
有乜優惠：雖然三菱代理為用家所提供嘅優惠，較其他汽車代理略少，但仍然好吸引㗎；其中至受車迷歡迎嘅Lancer車系，當中Lancer1.5MX-S嘅現貨型號，由去年接近12萬嘅售價，調低至$109,800起，可謂非常吸引；另外，如果買家選購現貨型號的話，重會送多你$3,000油券，真係可以幫你慳唔少㗎！