馬來西亞雖然受到經濟危機影響，不過就冇影響今屆環浮羅交怡單車賽嘅商業贊助，記得舊年大會只招待三十八位外地傳媒採訪，今年就增加多十位。呢四十八位行家來自二十個國家，其中加埋小記在內，香港有兩位獲得邀請。
大會為咗宣傳各車隊車手，噚日特別喺酒店開咗個小型嘉年華會，每當各車隊由美女帶上台宣傳時，大會就會奏起代表該國家嘅傳統音樂，加上有幾位歌手現場唱歌助興，呢啲咁正嘅氣氛，正好畀一班大戰在即嘅車手紓緩壓力。
大會新聞中心有免費電腦畀一班行家上網，但阿寶同沈教練就好識善用資源，佢哋兩師徒來到新聞中心，阿寶上網消磨時間，而教練就利用電腦搵資料，為阿寶未來十日嘅大戰做好準備。