數碼影音：
MP3Discman變身出擊

MP3、Discman等隨身聽玩換殼已經唔算新鮮事，不過作用僅限於美觀，冇乜實際作用，而今日為大家介紹嘅新款MP3Discman，不但可聽齊CD同MP3，重可以隨需要而轉換機殼，令機身體積可隨時變大縮小，方便拎出街聽。
記者、攝影：徐影龍
ImageGirl：Tobie

碟盤Size可變大縮小
呢部MP3Discman型號為CDMP-605，最搶眼就係可以換殼玩變身，不過唔係為咗貪靚，而係按光碟大細而變換，當欣賞普通12cm光碟時用原裝外殼，若只聽8cm迷你光碟時，則可換上另一套較細小嘅外殼，機身體積即時縮細，拎出街都方便啲。
一隻8cm光碟正常約可燒錄五、六首音軌，用處當然不大，不過由於CDMP-605支援MP3格式光碟，若是燒錄經壓縮嘅MP3音樂，則可多達50首（以標準4MB一首計），真係一日都聽唔晒。當然有需要的話，亦可將心愛MP3音樂燒錄至普通12cmCD-R，容量即時三級跳，一隻碟大概可燒錄160首MP3音樂，就算出門旅行或公幹都冇咁易聽悶。

支援騎呢光碟格式
雖然市面上有好多產品都號稱支援多格式光碟，不過講到全面性，CDMP-605都算數一數二。除咗一般嘅AudioCD外，當然亦支援CD-R、CD-RW等燒錄光碟，最特別係自製嘅MP3光碟，CDMP-605支援八層檔案結構，用家燒錄時可以按歌手、類型等分門別類好，認真方便。另外還支援MultiSession（多重分區）格式，用家只得CD-R都可分多次燒錄歌曲，唔使頭痛一次過燒百幾首歌。最無厘頭係額外支援VCD格式，不過就有聲冇畫，睇戲免問，唯一用途係聽演唱會VCD之用。

健康耳筒攞設計大獎
通常隨身聽附送嘅耳筒靚極有限，不過CDMP-605嘅健康耳筒就較有創意，呢個耳筒曾經喺美國InventionShow度攞過四個獎，最特別係耳筒設計並非塞入耳內，而係輕輕掛喺耳邊，好處係長時間聽都唔會耳仔痛，不過當身體擺動幅度大時就好易跌出嚟，例如跑步時就唔係咁啱用嘞！
另外值得一讚係機身肩負埋充電功能，只需連接火牛，便可為普通充電池進行充電工作，唔使另外插多個火牛咁麻煩，不過充電時間屬「慢叉」類型，每次需要超過四小時充電，即係每晚要充一次電。

抵讚：唔同光碟Size用唔同外殼，增添攜帶上嘅方便，賣價只係七百蚊度，算幾抵玩。
要彈：機身較大、外形一般。
代理：樂得實業
電話：23319493