黑期亂咁舞，港股升變跌。美國聯儲局維持息率不變，反映看好美國經濟復甦，美股全面反彈，港股噚日早段升得好靚，最高見過10953，但市傳黑期大戶壓價結算，期指轉炒低水，3月份期指更一度大幅低水逾一百點，港股受期指拖累倒跌收場，跌31點，收10725。
港股2002年落筆打三更，1月份埋單計數跌672點，跌幅5.9%。睇番恒指月線圖，連升3個月後以陰燭回吐，形勢轉淡，短期唔抽番上萬一點之上及再跌穿10700，有機會下試一萬點。
希望噚日真係好似傳聞咁講，因黑期結算影響恒指回落，港股踏入2月份可以好番啲。不過，市場開始擔心港股進入業績公布期，下個禮拜二公布業績嘅東亞銀行（023）呢兩日急跌兼成交大增，睇嚟張成績表都係……。港股踏入2月份，相信走勢會更為波動，年晚錢緊過債，大家都無謂亂咁博。
九鐵起西鐵，一筆胡塗帳，可能會影響佢哋爭取沙田至中環鐵路發展權，唔怪得呢兩日地鐵（066）好番啲。