採訪隱形富豪馬主蘇澤棠被綁架案，因影到槍匪跨欄逃走連環照嘅《蘋果》突發記者張家樂頓成大紅人，除咗西九龍警區重案組高級警司葉偉強要「駁」相協助查案外，重有熱心讀者表揚其勇敢而堅持要獎佢五千大元，張家樂以公司已給予重賞，所以將錢轉捐畀《蘋果》基金幫助其他人。
本港跑突發嘅記者有幾百人，好多有二十年資歷、經歷不少大新聞的行家都無佢嘅奇遇，張家樂把握到千載難逢的機會，在警匪駁火、子彈亂飛情況下，拍到重犯廬山真面目，確屬非常罕見。照片刊登後，香港各大電子傳媒爭相採訪呢名勇記者，記者協會亦邀請佢出席研討會。
有七年資歷嘅張家樂不但成為新聞界師弟的偶像，甚至有讀者傳真棘手投訴同案件指定由佢採訪報道。對於今次一攝成名，張家樂對八方表示「純屬運氣」，佢經歷過生死十秒，噚日在報社翻閱現場所有照片及其他報道，發覺匪徒轉身開槍時，若非及時趴下，後果實在不敢想像。回想採訪槍戰一役，佢謙稱雖然僥倖獲勝，但不敢自滿，因為往後重要面對更多挑戰，會以平常心對待同繼續做好自己本分。
E-mail：