八百個選委等咗咁耐，董特首噚日終於開第一個諮詢會。不過，阿董雖然事前應該有好多時間準備，但佢喺會上竟然要不停搵貓紙！八方初時覺得好離譜，但係諗落都好難怪佢，邊個叫佢要扮到自己樣樣識，選委又當佢萬能吖！
不過咁，好多嘢都唔係預計到嘅。好似周光暉噚日一企起身，擦老董鞋擦咗一大輪，聽到八方雞皮都起埋，點知一個掟彎就問佢近日嘅九鐵事件，難怪老董都要反問：「你又話支持我？」
去到第二場，突然有個音樂人大吐苦水，話經常得唔到政府撥款，希望老董畀啲精神支持喎！老董聽完之後都要反省吓啦，佢承認自己過去出席音樂活動唔夠多，將來一定要去多啲咁話。
噚日諮詢會重有好多騎呢問題，好似佛教衍空法師問特首，中國領導人有中南海，美國有白宮，唔知香港有冇計劃整番個特首府？老董聽完都失笑，不過反應幾快，即刻話：「董特首有個嘉慧園，我住喺屋企好舒服！」
不過笑完之後，冇幾耐又被迫轉話題，講到近來好多家庭慘劇，又跳樓又謀殺；老董呼籲感到壓力嘅市民冷靜，多啲同身邊朋友傾訴。佢又留意到近年離婚數字增加好多，原來佢已經同楊永強、林鄭月娥及蔡元雲傾過，睇吓有冇辦法解決，扭轉呢個唔多健康嘅趨勢。
（圖）睇貓紙的阿董
E-mail：