今日有兩隻創業板新股上市，經紀陳報料，話一隻得一隻唔得，叫小初估吓邊隻得。
小初幾乎想鬧佢，當小初係老懵董，唔使問梗係科瑞控股（8109）有得炒，媒體伯樂（8072）好難搞。
講真，兩隻股size都唔算細。起初小初都唔覺得科瑞有得炒，皆因佢嘅中央空調系統能源節約業務，有啲似格林柯爾（8056），所以覺得唔容易炒。
不過，科瑞保薦人時記，早排搞隻神州醫療（8186）技驚四座，加上包銷商漢記一手包辦嘅民企股大成生化（809），一直非常硬淨，而且經紀陳亦話唔見街貨滿街，所以小初覺得科瑞有短炒機會。
至於媒體伯樂，相信都唔使小初多講啦，雖然有百記打頭陣，但問題係同類股份白馬媒體（100）同埋媒體世紀（8160）表現認真麻麻，最終都係破底收場，媒體伯樂能否例外，實在唔多樂觀。