陳伶俐為了替大姑奶林敏怡的演唱會做宣傳，除主動約見記者外，更大爆三歲兒子林肯的緋聞，指他暗戀張學友歲半的女兒瑤瑤，令兩人成為娛樂圈最年幼的緋聞情侶，果然是不一樣的媽媽。
陳伶俐這個弟婦認真唔話得，為了替大姑奶林敏怡即將於文化中心舉辦的「滑爵士樂及流行曲演唱會」做宣傳，前晚她專程在中環藝穗會約見各大傳媒，更出動老公林敏驄和兒子林肯助陣。
陳伶俐除不停叫林肯錫姑媽讓記者拍照外，兩公婆更大爆快將三歲的林肯暗戀張學友只得歲半的女兒張瑤華，相信是藝人下一代最年幼的緋聞代表作。
陳伶俐說：「林肯同學友個囡囡瑤瑤（張瑤華）好friend，我發覺佢對瑤瑤與眾不同，成日無事獻殷勤，又經常偷望瑤瑤，所以我懷疑佢暗戀瑤瑤。」
活潑的林肯亦深受記者歡迎，其大姑媽林敏怡又送了不少圖書給他做禮物，每收到一本書，林肯就錫大姑媽一啖，𠱁得林敏怡十分開心。
林敏怡說：「今次呢個演唱會得到好多朋友支持，已經應承咗會出席嘅歌手有張學友、鍾鎮濤、譚詠麟、李克勤、陳慧嫻、林子祥同葉蒨文兩公婆應該都會到，張國榮、劉德華、周潤發同成龍我都打過電話畀佢哋，如果有時間佢哋都會出席。」
丈夫是美國人的林敏怡三年前嫁到彼邦，今次打算回流香港長住。
林敏怡說：「我同老公決定返嚟，主要係因為我爸爸年紀大，而且林肯又咁好玩，我老公之前都嚟過香港兩次，佢覺得可以適應香港嘅生活，所以決定返嚟發展。」
採訪、攝影：楊潔雯