旅遊發展局發表二○○一年全年旅客數字，達一千三百七十二萬五千三百三十二人次，增長百分之五點一，粗略平均數係每日三萬七千六百人次嚟香港。有咁嘅好成績，係旅客自十月後V型反彈，尤其是係內地旅客增加十七點五巴仙，達到四百四十四萬八千人，佔總旅客人次三十二點四巴仙，單係一個十二月，已經有四十五萬七千內地客到港。
數字如此，大家應該知道以後嘅大勢啦。內地企業招聘會，令會展逼爆玻璃；內地旅客來港，令零售業現一線生機，旺角油麻地及港東嘅酒店入住率高達九十一及九十巴仙，而全港平均入住率係七十九巴仙。我哋啲港燦要注意，回歸後，想發財過活，就要學普通話，讀中文書，為內地人服務。
睇完啲數字，喺灣仔一間六星豪華酒店碰到資深酒店專家T，於是恭喜佢生意興隆，多做內地客生意，點知專家T苦起塊面，嚡一聲：「收五百，賠五千。」何出此言？專家T解釋：「啲行家講，收一個內地客，每晚租金最多五嚿，但佢哋住完走咗之後，往往發覺間房煙味衝天，地氈有茶迹煙迹，浴室水浸，總之執餐懵，全部清潔，執妥，成本好易高達五千。其實我哋賣房畀旅行團，每間只收二百零三百蚊一晚，真係得個做字，不過𠵱家嘅環境，好過冇啦。」有得做就做住先，希望內地遊客多出外之後，學懂公德，唔會再為難啲酒店。