講開老董個諮詢會，競選辦安排佢好似成個明星咁出場，一開場先保持神秘，大家要先睇一段宣傳片，講吓佢過去嘅豐功偉績，大多係佢過去巡區片段，抱吓細路、派頸巾咁，原本都冇乜特別。但係奇就奇在一段應該有陳太四萬出場嘅迪士尼片段，最後竟然被人好刻意咁cut咗陳太，剩番老董同米奇老鼠兩個大頭！
話說呢段競選宣傳片，講到老董喺旅遊方面做過嘅嘢，難免會提到同迪士尼簽約呢件事。八方噚日睇老董段片，見個鏡頭郁來郁去，佢左邊都企咗個女士，但係只睇到個女士五分一塊臉，連隻眼都睇唔到，諗真啲，呢個咪係當日同老董一齊喺禮賓府，攬住米奇同米妮嘅陳太囉！不過米妮重慘過陳太，因為被競選辦斬到連影都冇。
八方心諗，唔知係咪陳太唔支持老董連任，所以唔可以放佢個樣落段片度。
不過競選辦噚晚同八方講，片段全部係以往公開場合播放過嘅片段，出現人物唔一定要支持董建華，更唔存在要簽支持書，而啲片全部喺商業製作公司同政府新聞處以正價買返嚟。但係陳太點解唔見得人，八方始終都係諗唔明。
E-mail：