市場一時傳吓中移動（941）會派息，帶動恒指升二百幾點；一時又傳出美國爆多一單類似安然事件，令美股急挫，拖低港股挫二百幾點，今期嘅期指結算真係好難玩，可以話完全捉摸唔到個市嘅方向。
如果個市持續咁飄忽，將會幾麻煩，因為港股現價實在唔平，芬佬手上雖然有錢，但唔一定要𠵱家入市，如果佢哋把心一橫聽ING霸菱話，調資到泰國玩，港股今年肯定要坐冷板櫈。其實阿董最好就係下令將官股出售額減低，吸引班芬佬入嚟再玩過，搞旺個市自然引埋散戶入市，經紀嘅失業情況自然會改善，到時班經紀一定會挺董。
市場傳出辰達永安（1189）會配售可換股債券畀和黃（013）及中策（235），其實係變相賣殼畀呢兩間公司。不過，黑客話辰達永安嘅真命天子應該係阿tom（8001），因為阿tom想拓展網上旅遊業務，收購辰達永安可以起到協同效應。佢重話長和系手頭上嘅Priceline.com有可能注埋入阿tom，順便增持阿tom股權。雖然話阿tom已經轉型為傳媒股，但廣告收入依然有限，開拓番啲網上業務賺吓錢都應該。
華聯（969）噚日急升25.9%，收0.73元，成交有964萬元。此股去年由0.20元水平急升至最高0.90元附近，升幅逾4倍，近期開始調整，一度跌破0.50元。聽講有人驚跌勢太急會影響到個孖展倉，所以又傳賣殼之類嘅消息嚟托吓價，但公司已發表聲明話冇料到。