寶林邨街市係將軍澳區一個較為耐嘅屋邨街市，經營至今接近十年。呢個街市唔算大，但就樣樣俱備，賣嘅食品係街坊價，最大賣點係呢度間唔中可以搵到啲超大棵而又少見嘅蔬菜，成把尺咁長又接近芥蘭咁粗嘅菜心大家見過未？又例如有蘋果Size大嘅番茄及紫紅色嘅豆角又食過未？想見識以上所講嘅「特大」蔬菜，就必要到寶林邨街市行一趟。
記者：陳冰麗 攝影：關文慧
寶發蔬菜係呢個街市內最大型嘅一檔，賣嘅蔬菜種類較多元化，除咗基本當造嘅西洋菜、芥蘭、生菜、菠菜等等之外，呢度最多嘅重係菜心，種類有四種，有特大Size菜心、中型菜心、白菜心及細棵菜心，中型及細棵菜心則係平時較常見，分別售$2.5及$4斤，係經濟之選。苦瓜要夏天至當造，但呢度早已有售，且質靚價平。
寶發蔬菜(36號舖)
肥仔源記蔬菜賣嘅則以芋薯、根菜及果菜類為主，有番薯、芋頭、蘿蔔、蓮藕、番茄等等，其中最搶手嘅係特大Size番茄，佢比平時見到嘅番茄大三分一有多，色澤亦較紅潤，夠鮮豔，肉厚而清甜，用嚟炒至啱，唔怕炒到爛晒，未食過咁大嘅番茄必要試試啦！
肥仔源記蔬菜(33號舖)
左方係特大Size番茄（$4斤），本地生產，右方則係普通番茄（$3斤），產自大陸，大Size番茄一個都有六、七両重，而差唔多要兩個普通Size番茄加埋至接近佢嘅重量。
喺正肥仔源記對面就係呢個余記菜檔，除咗一般大路菜心、蘿蔔、蓮藕等之外，呢度間唔中都可以搵到啲街外較少見嘅特色蔬菜，今趟就有紫紅色豆角，只有呢個檔口至搵到咋！
余記(93號舖)
紫紅色豆角粗幼同白豆角差唔多，但就較為實淨，食落較脆口，主要嚟自中國，嚟貨好少，間中至搵到，每斤$4，唔算貴。