美消費信心指數創出5個月以來新高，加上耐用品定單上升，美國經濟在較後時間復甦，迹象已愈來愈明顯，無論聯儲局是否再調低息口，對股市都應該係利好消息，但禮拜二美股非但冇受刺激，反而大散，主要係投資者冇咗信心，罪魁禍首係繼Enron之後，又有一兩家大企業傳出「造假帳」嘅消息，股民爭相走避，引發拋售潮。
港股大升一日，受外圍拖累，又再散過。恒指最低曾跌穿10700大關，好在仍能守穩在上個禮拜低位之上，收市10756，大跌257點，又落番10日線（10860）之下，短期大市仍係爭持之局，上阻力11100，若跌穿支持，則會見10500。
大市不濟，國企股則明顯有勢，個別且逆市而升。行業重組和外資入股，係未來國企將會用來大炒嘅概念，汽車、鋼鐵、石化同航空類，總之並非策略性嘅行業，都會受惠。國企指數噚日收1917，微跌4點，由去年8月開始，走勢基本上形成一個大型頭肩底，近日升破頸線阻力後，正進行後抽整固，升浪再起，目標將指向2200。
鋼鐵股以重慶鋼鐵（1053）的表現最為突出，收1.09元，升2仙，旗形整固已第3日，隨時可再起升浪，短線目標指向1.25元。若以去年7月開始的大型頭肩底看，頸線在1.16元水平，一旦破位而上，則大升浪便可確認，今年內股價可見1.75元。現水平入市，預期升幅達60%。
馬鋼（323）近日升到0.72元後回落，剛好係受制於大型頭肩底頸線的阻力，若有大成交支持破位而上，中線量度上升目標為1.15元。
tom.com（8001）急升後昨日跟市調整，最低3.8元，收3.875元，僅跌3個位，表現比大市為強，短線仍可留意。tom股價若上破3.975元阻力，仍可以4.5元為目標才回吐。