許志安（安仔）同蘇永康（康仔）、何超儀同男友陳子聰等，前晚分別去咗蘭桂坊蒲。問安仔同康仔去邊度玩，安仔話：「康仔啱啱喺內地做完宣傳，我慶祝佢返嚟。」而康仔就搞笑話佢都要同安仔慶祝，康仔話：「我祝佢順利過渡囉！」
安仔見記者喺度採訪，佢好蠱惑咁話：「頭先我喺邊度見到邊個邊個！」記者問佢係咪講緊鄭秀文，安仔就即刻走人。
而何超儀就同男友陳子聰拍拖，帶外籍朋友去蒲twentyonetwentyonebar，陳子聰見到記者，立即叫唔好影佢哋啲朋友，之後重即刻同超儀分頭走人。
陳冠希（Edison）噚日接受新城電台《聯fan所》訪問，有人報料話佢成日揸車去杏花邨等緋聞女友BoBo陳文媛，重俾住客投訴。Edison懶理咁話：「唔需要講啲乜嘢，做過一定會認。我係有去過杏花邨，李燦森都係住嗰度，我見邊個，唔關你哋事。」早前Edison俾台灣網站封為「最受歡迎的被包男星」三甲，Edison頗自豪咁話：「我係無價㗎！我唔要做呢啲第一。」
陳小春同周杰倫早前被傳不和，佢兩個上星期喺北京出席完ChannelV頒獎禮後，一齊去食消夜，喺一間好特別嘅烤肉店大擦一餐，用行動打破不和傳言。小春當日身患感冒，但仍然開心到飲咗幾杯啤酒，卒之感冒菌入眼，搞到要延遲上海工作，要返香港睇急症㖭呀！
噚日係鄧麗君（Teresa）嘅生忌，一班忠心歌迷去到佢位於赤柱嘅故居獻花同上香。Teresa嘅管家亦預備咗主人生前最鍾意食嘅餃子招呼歌迷。而香港歌迷會會長張小姐話，佢哋一班會員會喺五月去台灣金寶山拜祭鄧麗君。
原本喺鄧麗君故居後放咗一幅大油畫，不過近日渠務署要求拆，但係一班歌迷要求當局遲啲先拆，因為佢哋想喺偶像生忌當日保持故居原貌。
何超瓊噚日去咗信德中心嘅「金色年代」餐廳，宣傳由畢彼特同茱莉亞羅拔絲主演嘅新片《盜海豪情》。超瓊遲啲會安排部戲喺澳門搞首映，到時會請埋賭王爹哋何鴻燊。
《盜》片內容講打劫賭場，對賭王做賭場生意嚟講，好似唔吉利，超瓊話：「套戲嘅手法，睇完應該會吸引好多人去賭場賭幾手。」超瓊話首映完會安排大家賭吓，贏咗啲錢會用作慈善用途。