昨日小初提到辰達永安（1189）傳出批股，公司即刻就停牌，話會發行新股。
經紀陳立即報料，話辰達永安今次批股唔係派通街，好似係發行畀單一嘅獨立投資者，聽講來頭重好勁㖭，所以停牌前一日股價急升，擺明係春江鴨入局。
小初記得，先一排辰達永安都批過股畀北京控股（392）阿媽，但唔見消息對股價有幫助，而且話口未完，辰達永安老闆又跟住減持。睇吓佢復牌開大定開細先算。
另外，小初曾經買過嘅日東科技（365），近排成交增加，前日股價重一度抽上89仙。點知公司公布，話主席同埋一個董事減持咗2千幾萬股，令隻股回軟，跌咗4.8%，收78仙。
小初記憶所及，今次都唔係日東第一次有老闆減持，兼且減持個價又唔係特別好，所以有多少令人唔明，雖然日東基本因素唔錯，但老闆減持好容易令人對公司印象麻麻。